Ndërsa Hollywood përgatitet për ceremoninë e 98-të të ndarjes së çmimeve Academy Awards, që do të mbahet natën mes 15 dhe 16 marsit 2026, vëmendja e publikut nuk përqendrohet vetëm te nominimet dhe tapeti i kuq. Një tjetër element që ngjall kuriozitet janë edhe paketat luksoze të dhuratave që u jepen të nominuarve.
Këto pako të famshme njihen si çantat e dhuratave “Everyone Wins” dhe u shpërndahen aktorëve, aktoreve dhe regjisorëve të nominuar, pavarësisht nëse arrijnë të fitojnë një statujë të artë apo jo.
Ndryshe nga sa mendohet shpesh, shpërndarja e këtyre dhuratave nuk organizohet nga Academy of Motion Picture Arts and Sciences, por nga kompania e marketingut Distinctive Assets me bazë në Los Angeles. Kjo kompani prej vitesh përgatit paketat luksoze që shoqërojnë ceremoninë e njohur të kinemasë.
Çantat përmbajnë dhurata me vlerë që shpesh arrijnë në gjashtë shifra. Në to përfshihen udhëtime luksoze, produkte kozmetike, pajisje teknologjike dhe shërbime të ndryshme ekskluzive. Përveç shpërblimit simbolik për të nominuarit, këto pako shërbejnë edhe si një mënyrë promovimi për marka të ndryshme, veçanërisht për startup-e dhe kompani që mbështesin iniciativa sociale.
Themeluesi i Distinctive Assets, Lash Fary, shpjegoi se dhuratat nuk jepen sepse të famshmëve u mungon diçka, por si një mënyrë për të vlerësuar kreativitetin dhe punën e tyre, ndërsa njëkohësisht nxjerrin në pah marka dhe ide inovative.
