Pas përfundimit të rrugëtimit të tij në BBVK, Labinot Rexha ka reaguar publikisht me një deklaratë të fortë, duke ngritur pikëpyetje mbi mënyrën se si ndodhi eliminimi i tij. Përmes postimeve, ai ka lënë të kuptohet se largimi nuk ishte thjesht rezultat i votave të publikut, por sipas tij, mund të ketë qenë i ndikuar nga vendime të brendshme të produksionit.
Rexha theksoi se kufizimi i votave për çdo numër telefoni dhe komentet publike që, sipas tij, nxisnin largimin e tij, kanë ndikuar në rezultat. Ai nënvizoi se diferenca përfundimtare ishte shumë e ngushtë (48% me 52%) duke argumentuar se kjo tregon mbështetje të madhe nga publiku, pavarësisht rrethanave.
Në një tjetër deklaratë, Labi pretendon se pas daljes ka dëgjuar informacione të reja që përforcojnë dyshimet e tij për një eliminim të planifikuar paraprakisht. Ai përmendi edhe biseda që, sipas tij, sugjerojnë se ekzistonte një ide për ta larguar para finales për shkak të mbështetjes së madhe që kishte.
