NASA do të përshpejtojë planet për ndërtimin e një reaktori bërthamor në Hënë deri në vitin 2030, si pjesë e synimeve për të krijuar një bazë të përhershme njerëzore në sipërfaqen hënore. Vendimi vjen në kontekstin e garës hapësinore me vende si Kina dhe Rusia, të cilat po ashtu planifikojnë impiante të ngjashme.
Shefi i përkohshëm i NASA-s, Sean Duffy, kërkoi nga kompanitë private të paraqesin propozime për një reaktor që gjeneron të paktën 100 kilovat energji. Megjithëse kjo është shumë më pak se kapaciteti i një turbine të zakonshme ere, konsiderohet thelbësore për fuqizimin e një baze në Hënë, ku energjia diellore është e pamjaftueshme për shkak të cikleve të errësirës 2-javore.
Shkencëtarët bien dakord që energjia bërthamore është mënyra më e besueshme për furnizim të vazhdueshëm me energji në Hënë. Megjithatë, ekzistojnë shqetësime për sigurinë e lançimit të materialeve radioaktive në hapësirë dhe për motivet politike të këtij vendimi.
Pavarësisht sfidave teknike dhe buxhetore – përfshirë shkurtimet e planifikuara në buxhetin e NASA-s dhe vonesat në programin Artemis – disa ekspertë thonë se ndërtimi është teknikisht i mundur deri në 2030, nëse ka mbështetje të mjaftueshme financiare dhe logjistike.
