Një alarm u dha mëngjesin e së enjtes (15 janar) në aeroportin El Prat të Barcelonës, pasi një avion i Turkish Airlines kreu një ulje emergjente për shkak të një kërcënimi për bombë.
Avioni, një Airbus A321 që operonte fluturimin TK1853 nga Stambolli drejt Barcelonës, ishte planifikuar të mbërrinte në orën 11:00, pasi ishte nisur në orën 09:00. Pak para uljes, autoritetet u njoftuan për një kërcënim të mundshëm, çka çoi në aktivizimin e menjëhershëm të protokolleve të sigurisë.
Sipas një deklarate të Aena-s, operatorit të aeroporteve spanjolle, “për shkak të një kërcënimi u aktivizuan procedurat përkatëse të sigurisë”, duke theksuar se situata po vlerësohet nga forcat e sigurisë. Po ashtu, u bë e ditur se incidenti nuk ndikoi në funksionimin normal të aeroportit.
Pas uljes së sigurt, shërbimet e emergjencës rrethuan avionin dhe pasagjerët u evakuuan pa probleme, ndërsa autoritetet nisën kontrolle të detajuara në bord.
Mediat spanjolle raportojnë se dy avionë luftarakë shoqëruan fluturimin e Turkish Airlines deri në uljen e tij, si pjesë e masave standarde të sigurisë në raste të tilla.
Hetimet janë ende në vijim dhe deri më tani nuk është konfirmuar gjetja e ndonjë objekti të dyshimtë në avion.
