Sekretari i përgjithshëm i NATO-s, Mark Rutte, ka deklaruar se aleanca nuk mund të konfirmojë aktualisht pretendimet e Izraelit për kapacitetet raketore të Iranit.
Kjo vjen pasi ushtria izraelite (IDF) pretendoi se Irani disponon raketa të afta për të goditur qytete evropiane si Londra, Parisi dhe Berlini.
Rutte theksoi se NATO po i shqyrton këto informacione, por deri tani nuk ka prova që i mbështesin. Ai shtoi se, nëse rezultojnë të vërteta, këto pretendime do të nënvizonin rëndësinë e masave të sigurisë të ndërmarra nga aleatët.
Megjithatë, sipas tij, është e qartë se Irani është shumë pranë arritjes së këtij kapaciteti raketor. NATO po vlerëson gjithashtu nëse këto aftësi mund të përfshijnë objektiva të caktuara, si baza ushtarake britanike në Diego Garcia.
Në përfundim, Rutte theksoi se, pavarësisht mungesës së konfirmimit, zhvillimet në programin raketor të Iranit mbeten një shqetësim serioz për sigurinë ndërkombëtare.
