Një aksident ajror i rëndë ka ndodhur të dielën në jug të New Jersey-t, SHBA, ku dy helikopterë u përplasën në ajër, duke shkaktuar humbjen e një jete dhe plagosjen e rëndë të një personi tjetër.
Sipas Administratës Federale të Aviacionit (FAA), përplasja ndodhi rreth orës 11:25 të paradites, ndërsa shërbimet e emergjencës u njoftuan menjëherë për incidentin. Policia dhe zjarrfikësit mbërritën në vendngjarje dhe arritën të shuanin flakët që kishin përfshirë njërin prej helikopterëve.
Një person u shpall i vdekur në vend, ndërsa një tjetër u transportua me urgjencë në spital në gjendje kritike. Pamje video të publikuara në rrjet tregojnë momentin kur një helikopter rrotullohet në ajër para se të përplaset me tokën.
FAA dhe Bordi Kombëtar i Sigurisë së Transportit (NTSB) kanë nisur hetimet për të përcaktuar shkaqet e aksidentit, ndërsa identiteti i viktimave ende nuk është bërë publik.
