Figura prej dylli e Princeshës Diana zbulohet në Paris me "fustanin e hakmarrjes"

Muzeu i dyllit Grevin në Paris ka zbuluar një figurë të re të Princeshës së ndjerë Diana, e realizuar me përpikëri në madhësi reale dhe e veshur me fustanin e famshëm të zi, të njohur si “fustani i hakmarrjes”. Ky zbulim vjen disa dekada pas vdekjes së saj tragjike në kryeqytetin francez, raporton Associated Press.

Figura paraqet Dianën me fustanin e zi elegant dhe të hapur, të cilin ajo e veshi në eventin e Galerisë Serpentine në Londër në vitin 1994, të njëjtën mbrëmje kur Princi Charles pranoi publikisht lidhjen e tij jashtëmartesore me Camillan. Kombinimi i takave të larta, varëses me perla dhe çantës së vogël në dorë i jep skulpturës një realizëm të fortë, ndërsa muzeu nënvizon simbolikën e fuqishme të veshjes.

Zyrtarët e muzeut thanë se drejtori i Grevin porositi figurën pas zhgënjimit me versionin e paraqitur në muzeun britanik Madame Tussauds. Zbulimi përkon me 30-vjetorin e intervistës historike të Dianës për BBC “Panorama”, e cila tronditi monarkinë dhe pati ndikim të madh në perceptimin publik ndaj familjes mbretërore.

Për Parisin, kjo statujë ka një domethënie të veçantë. Diana humbi jetën në një aksident automobilistik në vitin 1997 në një tunel pranë lumit Sena, dhe qyteti vazhdon të tërheqë vizitorë që vendosin lule dhe mesazhe në nder të saj.

Kuratorët e muzeut kanë zgjedhur ta vendosin figurën e saj larg asaj të ish-burrit dhe ish-vjehrrës, por pranë figurës së Marie Antoinette, një tjetër figurë historike mbretërore që humbi jetën në Paris.

Autorja franceze Christine Orban, e cila ka shkruar romanin “Mademoiselle Spencer”, e përshkroi fustanin e zi si një pikë kthese në jetën e Dianës. Sipas saj, veshja simbolizonte çlirimin e princeshës nga rregullat e ngurta të familjes mbretërore:
“E zeza vishej vetëm për funerale. Një fustan kaq seksi për një Princeshë të Uellsit ishte diçka e pazakontë,” tha ajo, duke theksuar se Diana atë natë vendosi të shkëlqente dhe të linte përshtypje.

Me historinë e tij mbi 100-vjeçare, muzeu Grevin po përpiqet të rinovojë koleksionin dhe të rrisë numrin e vizitorëve, i cili ka arritur rreth 700 mijë në vit. Zbulimi i figurës së Dianës ka tërhequr qindra njerëz, të cilët panë statujën për herë të parë.

“Parisi nuk e la kurrë plotësisht Dianën”, tha një vizitor 38-vjeçar, ndërsa një studente 24 vjeçare shtoi se për brezin e saj, Diana është “princesha e parë moderne, joshëse dhe e prekshme”.

Figura e re prej dylli e përjetëson edhe një herë mbretëreshën e zemrave dhe lidhjen e saj të pashlyeshme me qytetin e dritave.