Një gjykatë në Paris ka rrëzuar kërkesën e qeverisë franceze për të pezulluar për tre muaj faqen e gjigantit të modës së shpejtë Shein, pas polemikave për shitjen e kukullave të seksit me pamje fëmijërore në platformë. Gjykata e cilësoi masën si “joproporcionale”.
Megjithatë, ajo urdhëroi vendosjen e verifikimit të moshës për shitjen e produkteve për të rritur, duke parashikuar një gjobë prej 10 mijë eurosh për çdo shkelje.
Autoritetet franceze ndërmorën veprim pas raportimit nga enti i mbrojtjes së konsumatorit, por gjykata theksoi se rastet ishin të izoluara dhe se Shein i kishte hequr menjëherë produktet problematike sapo u njoftua. Kompania kineze ka njoftuar gjithashtu ndalimin e shitjes së të gjitha kukullave të seksit në nivel ndërkombëtar.
Shein deklaroi se mbetet e angazhuar për mbrojtjen e konsumatorëve francezë dhe respektimin e ligjeve vendore.
