“Nga majat e maleve të Shqipërisë deri në skenën ndërkombëtare, Arilena Ara ka ndjekur zërin e saj përtej kufijve, tingujve dhe emocioneve. Tani, fituesja e X Factor, sensacioni i klasifikimeve muzikore dhe ikona po hyn në kapitullin e saj më të guximshëm deri tani: debutimi në SHBA me baladën e fuqishme të shkruar nga Diane Warren, ‘Weightless’.”
Kështu nis artikulli i “TMRW Magazine” për yllin e muzikës shqiptare që ka marrë flatra të reja për t’u ngritur në qiej, atje ku sfidon kufijtë e saj, duke vijuar:
“Në këtë intervistë ekskluzive, Arilena rrëfen se çfarë përfaqëson kjo këngë për të, si është të punosh me një legjendë, si ekuilibron ndjeshmërinë me ambicien, edhe pse udhëtimi i saj sapo ka filluar. E vendosur mes forcës dhe butësisë, së kaluarës dhe së ardhmes, “Weightless” është më shumë se një këngë — është momenti i saj për t’u ngritur.”
-"Weightless" shënon debutimin tënd në SHBA — çfarë domethënie personale ka kjo këngë për ty dhe si u realizua bashkëpunimi me Diane Warren?
"Weightless" shënon një moment shumë të rëndësishëm në jetën time — është më shumë se thjesht debutimi im në SHBA, është fillimi i një kapitulli të ri. Kjo këngë ka një kuptim të thellë për mua, sepse pasqyron mënyrën se si jam ndier gjatë këtij rrugëtimi: e ndjeshme, e guximshme dhe e gatshme për të fluturuar. E takova Diane Warren në studio para dy vitesh. I tregova disa nga këngët e mia, i rrëfeva historinë time dhe i shpjegova çfarë po përpiqesha të ndërtoja në SHBA. Ajo më pa në sy dhe më tha: ‘Unë besoj tek ti’. Pastaj më luajti një demo që kishte shkruar — ishte aq e fuqishme, aq emocionale — dhe më tha se mendonte që ishte kënga perfekte për mua, diçka që do të tregonte me të vërtetë se çfarë jam në gjendje të bëj me zërin tim.
-Diane Warren është shprehur se pa diçka të guximshme dhe autentike tek ti. Si ndikoi kjo lidhje në performancën dhe vetëbesimin tënd?
Ishte një përgjegjësi e madhe të dëgjoja Diane të thoshte diçka të tillë për mua, dhe të sillja në jetë vizionin e saj përmes muzikës së saj. Më tha: “Ke dy javë. Izolohu në studio, bëj çfarë të ndjesh me këngën, por më impresiono!” Ai moment më shtyu vërtet përpara. E dija që duhej të jepja gjithçka që kisha.
-Ke qenë anëtare jurie në X Factor Albania, ke prezantuar emisione të mëdha televizive dhe ke performuar në mbarë Europën — cila është ndjesia ndryshe në tregun amerikan?
Më pëlqen ta mendoj si pjesë të së njëjtës formulë. E kam përgatitur veten për këtë moment gjithë jetën time. Megjithatë, ky është hapi më i madh që kam ndërmarrë ndonjëherë në karrierën time dhe, sinqerisht, jam njëkohësisht e entuziazmuar dhe e frikësuar. Por në thelb të gjithçkaje, ajo që ka më shumë rëndësi për mua është lidhja me njerëzit, t’i prek emocionalisht përmes muzikës sime. Kjo është ajo për të cilën kam lindur — të performoj!
-Kur dëgjove “Weightless” për herë të parë, the se të shtyu të eksploroje vokalin në një nivel të ri. Cila ishte pjesa më sfiduese e regjistrimit?
Kur e dëgjova “Weightless” për herë të parë, e kuptova menjëherë që nuk do të ishte e lehtë — dhe pikërisht kjo më emocionoi. Kënga kërkon shumë kontroll, ndjenjë dhe diapazon. Duhej të hyja thellë si vokalisht ashtu edhe emocionalisht. Pjesa më sfiduese ishte ta bëja të dukej e lehtë, ndërsa ruaja gjithë atë intensitet. Doja që çdo notë të merrte frymë, të jetonte, jo vetëm të ishte teknikisht perfekte. Më shtyu jashtë zonës sime të rehatisë në mënyrën më të bukur.
-Videoklipi përzien imazhe kozmike me një performancë emocionale. Sa e përfshirë ishe në zhvillimin e konceptit?
Koncepti u krijua nga ekipi im, veçanërisht menaxheri im. Ata morën kohën për të analizuar çdo fjalë të tekstit dhe për ta sjellë vizualisht atë domethënie në jetë. Për mua ishte e rëndësishme që videoja të kishte edhe një pjesë të autenticitetit tim, rrënjët e mia, në këtë rrëfim. Ishte një mënyrë e bukur për të lidhur vizualet kozmike me diçka thellësisht personale.
-Ke arritur sukses të jashtëzakonshëm në Europë, sidomos me “Nëntori”. Ndjen më shumë presion apo liri në këtë kapitull të ri?
Sinqerisht, i ndjej të dyja — edhe presionin, edhe lirinë. Pas gjithçkaje me “Nëntori”, padyshim që ekziston një peshë pritshmërish.. Por më shumë po përqendrohem tek liria për t’u rritur dhe për të shprehur atë që jam vërtet tani. Këtë kapitull të ri e ndiej si një mundësi për të qenë e ndjeshme dhe autentike në mënyra që më parë nuk kam qenë. Ajo përzierje emocionesh dhe pasigurie është ajo që më shtyn përpara.
-Ke mentoruar artistë të rinj në X Factor — çfarë këshille u jep tani që po merr vetë hapa të guximshëm?
Mentorimi në X Factor ishte një përvojë shumë e vlefshme. Fitova dy herë radhazi me kategoritë e mia, çka ishte një moment krenarie për mua. Karrierën time e kam nisur duke fituar X Factor 13 vite më parë, ndaj gjithmonë u them që të ndjekin ëndrrat e tyre me gjithë shpirtin. Nëse muzika është më shumë se pasion, nëse është ajo që je vërtet, atëherë duhet të japësh gjithçka. Qëndroji besnik vetes, puno fort dhe mos ki frikë të ndërmarrësh rreziqe!
-Shqipëria na ka dhuruar emra të mëdhenj në muzikë pop — Dua Lipa, Rita Ora, Bebe Rexha. Çfarë ka të veçantë zëri dhe historia jote që dëshiron ta dëgjojë bota?
Shqipëria i ka dhuruar botës zëra të jashtëzakonshëm dhe ndihem e nderuar që qëndroj mes tyre. Historia ime është shumë personale. Që kur isha e vogël, ëndërroja që zëri im të kapërcente kufijtë dhe të prekte njerëz anembanë botës. Ajo që e bën unik zërin dhe historinë time është ndershmëria e pastër që derdh në çdo notë. Muzika ime është një pasqyrim i udhëtimit tim, i rrënjëve dhe i shpirtit tim. Dua që dëgjuesit të ndiejnë diçka të vërtetë përmes zërit tim.
-Çfarë mund të presin fansat nga EP-ja jote e ardhshme me Diane Warren? Ka ndonjë surprizë apo bashkëpunim që duhet të presim?
Po, një EP me Diane Warren po ndodh vërtet dhe jam shumë e emocionuar për këtë. Të punosh me të ka qenë një ëndërr e realizuar. Po përgatisim edhe disa surpriza, përfshirë bashkëpunime me disa artistë të jashtëzakonshëm. Nuk mund të them shumë tani, por ka shumë për t’u pritur. Do të jetë një projekt shumë i veçantë!
-Dhe e fundit — çfarë të bën të ndihesh vërtet ‘weightless’ këto ditë?
Aktualisht është gjithçka njëherësh — muzika, dashuria, ato momente të vogla qetësie mes kaosit. Po mësoj të vlerësoj mënyrën si këto pjesë bashkohen për të më ngritur lart dhe për të më bërë të ndihem vërtet ‘weightless’.
-Ke performuar përpara miliona njerëzve, ke gjykuar talente dhe ke fituar çmime të mëdha — por cili është një gjë krejtësisht e rastësishme që ende të bën nervoze?
Kjo është një pyetje shumë e mirë — m’u desh ta mendoja pak! Kam performuar përpara miliona njerëzve, por diçka aq e thjeshtë sa të bëj pazar ose të jem në publik me miqtë, ende më bën nervoze. Jam çuditërisht e turpshme para kamerave në jetën time private, ndaj kur dikush më njeh apo nxjerr telefonin, ngurroj. Është qesharake — më ngjit në skenë dhe ndihem si në shtëpinë time, por më kërko të blej avokado nën presion dhe filloj të panikosem pak!
-Nëse nuk do të ishe këngëtare, prezantuese apo mentore — cili profesion i çuditshëm mendon se do të ishe shumë e mirë?
Ndoshta një agjente e FBI-së — po bëj shaka! Por ka diçka rreth vëzhgimit të detajeve të vogla dhe zbulimit të së vërtetës që më tërheq. Mendoj se do të isha fotografe e mirë. Gjithmonë më ka pëlqyer ideja e kapjes së emocioneve në një moment të vetëm — si të ngrish një ndjesi në kohë. Edhe nëse nuk do të isha këngëtare, prezantuese apo mentore, e di që sërish do të tregoja histori në një mënyrë apo tjetër. Arti dhe shprehja — gjithmonë gjejnë rrugën për t’u rikthyer tek unë.
Galeria fotografike
